Shirdi Sai Telugu

శ్రీసాయినాథాయనమః. ఆనందమనేది ఓ చక్కటి అనుభూతి. సృష్టిలో కేవలం మనుషులేగాక పశుపక్ష్యాదులు సయితం ఎదో క్షణంలో ఆనందానుభూతి పొందుతూనే వుంటాయి. కాని ఆ అనుభూతి క్షణికమో లేక ఏకొద్దిపాటి సమయానికో పరిమితమౌతుంది. తాననుకొన్న కోరిక చిన్నదైనా లేక పెద్దదైనా తీరినవేళ వ్యక్తి ఆనందానుభూతి పొందుతాడు. కాని కొంతకాలం తరువాత ఆ ఆనందక్షణాలు మాయమౌతాయి. మనసు తన మామూలు మూసలో మరల చరిస్తూ ఎదో తెలియని అన్వేషణ కొనసాగిస్తుంది. మునుపు కోరిక తీరినందువలనగదా సంతోషం కల్గిందని తలచిన మనసు మరొక కోరికద్వారా అలాంటి మధురక్షణాల మరలపొందుటకై తపిస్తుంది. మానవ నిత్యావసరములైన అన్నవస్త్ర నివాసాదాలకు పరిమితములైన కోర్కెలు సహజం, సాధారణజీవనానికి ఆవశ్యంకూడా. కాని అవి లభించినపిమ్మటకూడా కోర్కెల వేట కొనసాగుతూనే వుంటుంది, మనసు మాయలేడికై పరువులిడుతూనే వుంటుంది ఎదో తృప్తి, శాంతుల పొందుటకు అవిశ్రాంతి ప్రయాణం. యోగ, వేదాంత గ్రంధాలను పరిశీలిస్తే ఈ నిత్య పోరాటానికి సంబంధించిన కొన్ని మూల సత్యాలు బయటపడతాయి. మనిషి సత్, చిత్, ఆనంద అనగా సచ్చిదానంద రూపుడు. అనగా వ్యక్తి భౌతిక, మానసిక, ఆనందములు కలబోసిన చైతన్యరూపుడు. ఆనందమనేది వ్యక్తి సహజ స్వభావం. క...

శ్రీసాయినాథాయనమః. పాఠక భక్తులెల్లరకు విజయదశమి శుభాకాంక్షలు, సాయిబాబా ఆశీసులు! సద్గురువు అలౌకిక బ్రహ్మజ్ఞానానికి, దైవత్వానికి ప్రతీక; ఓవర్ డ్రాఫ్ట్ లౌకిక డబ్బువ్యవహారాలకు సంబంధించిన అంశము. ఈ రెండూ ఉత్తర దక్షిణ ధృవాలలా, నీరూ నిప్పులా పరస్పరం వ్యతిరేక విషయాలు. మరీ రెంటికి సమన్వయమెలా కుదురుతుంది యనే సందేహం సాధారణంగా కలుగుతుంది. ఈ క్రిందటి వివరణ పరిశీలించిన పిమ్మట అసలు విషయం బోధపడగలదు. సద్గురువు సాక్షాత్తు దైవ స్వరూపుడు, భక్తులపట్ల వాని అవ్యాజ కరుణయే ఇచట పేర్కొనబడిన ఓవర్ డ్రాఫ్టు. ఈ విషయమై పూజ్య ఆచార్య శ్రీ ఎక్కిరాల భరద్వాజ గారిలా వచించారు, "సిరిసంపదలు తాను ఆర్జించిన పుణ్యం ధర్మం వల్లనే సంక్రమిస్తాయి. అది బ్యాంకు బ్యాలన్స్ లాంటిది. తానేమీ ఇవ్వకుండా, దానధర్మాలు చేయకుండా అవినీకు ప్రసాదించమని బాబాను కోరడం చిత్రాతిచిత్రం. ఈశ్వర సహాయం ఎప్పుడు? మనము ఇతరులకు సహాయ పడ్డప్పుడు మాత్రమే! సిరిసంపదలు కేవలం సుఖాలకు వెచ్చిస్తే అవి వ్యర్ధమే. అయినా అట్టి గత పుణ్యం లేకపోయినా, బాబాను ఆశ్రయించాము కనుక తిండికీ,గుడ్డకు ఓవర్ డ్రాఫ్ట్ శాంక్షన్ చేయించి, కరుణించటము ఆ ప్రేమమూర్తి అపార కరుణకు నిదర్శనము. ...

శ్రీసాయినాథాయనమః! భగవద్గీత యందు శ్రీకృష్ణ పరమాత్మ ఎల్లవేళలా అనన్యభక్తితో తననే సేవించాలని మరియు ఆలా సేవించు వారల యోగక్షేమములను తాను వహిస్తానని అర్జునికి బోధించాడు, ప్రస్తుత వ్యాసంలో శ్రీసాయిబాబా తమ గురువునెలా సేవించారో వివరించుకొనెదము. ప్రప్రధమంగా బాబా భక్తులు, తమనెలా సేవించాలో యెచ్చటను ప్రత్యేకించి వివరించలేదు. కాని బాబావారి చర్యలు, సామాన్యసంభాషణలు మరియు వారి పావనచరితములు మౌనముగా ప్రబోధము జేయుచు తమభక్తుల ఉన్నతమార్గముల నడిపించుచున్నవి. అలా సాయి, చెప్పకచెప్పిన అమూల్య సందేశాలనిచట స్మరించుకొనెదము. ప్రస్తుత విషయమునకు శ్రీసాయిసచ్చరిత్రము మూలము. సచ్చిష్యునకు అణకువ, అభిమానరాహిత్యము, ఇంద్రియనిగ్రహము, ఏకాగ్రచిత్తము, గురువుపై పరిపూర్ణవిశ్వాసము, గురువాక్యపాలన, సదాగురుస్మరనయే దప్ప ఇతర ఆలోచనల రానీయకుండుట మరియు తుదకు సర్వస్యశరణాగతి అనగా తమకు తామే గురునకు సంపూర్ణ ఆత్మార్పణము జేయుట. ఈ విశేష ఉత్తమ శిష్యలక్షణములు బాబాయందెలా ప్రతిబింబించాయో తెలిసికొనుట సాయిని సేవించు భక్తులకు మార్గదర్శకములు కాగలవనే ఆలోచనే ఈ ప్రస్తుత రచనకు ప్రేరణయని పాఠక భక్తులు గ్రహింపగలరని ఆశిస్తున్నాను. జౌహర్ ఆలీ ఒక కపటగుర...

శ్రీసాయినాథాయనమః. శ్రీరమణ దేవాయనమః. పాఠక భక్త మహాశయులెల్లరికి శ్రీకృష్ణాష్టమి శుభాకాంక్షలు! " నన్ను వెదుకుటకు నీవు దూరముగాని మరెచ్చటికిగాని పోనక్కరలేదు. నీ నామము నీ యాకారము విడిచినచో నీలోనేగాక యన్నిజీవులలోను , చైతన్యము లేదా యంతరాత్మయని యొకటి యుండును. అదే నేను. దీనిని నీవు గ్రహించి, నీలోనేగాక అన్నిటిలోను నన్ను జూడుము." శ్రీ సాయిబాబా. " ఓ అర్జునా! నేను సకలభూతములయొక్క హృదయ కమలమందుండు ప్రత్యగాత్మ(Self)ను, సమస్తభూతములయొక్క ఆది మధ్యాంతములును నేనే". భగవద్గీత 10:20. క్లుప్తంగా శ్రీకృష్ణపరమాత్మ సందేశమునీవిధంగా గ్రహింపగలము,' ప్రతిమనిషి, తన దేహానికి , మనసుకు, బుద్ధికి మరియు అహంకారానికి అతీతంగా లోలోపరి పొరలలో దాగిన సత్ చిత్ ఆనంద రూప భగవంతుని ఉనికిని సాధనద్వారా గ్రహించి ఆపై ఆత్మానుభవము లేక ఆత్మసాక్షాత్కారము పొందుటయే మానవజన్మ పరమార్ధము'. తమభక్తులెల్లరు ఈ అనుభవాన్ని పొందుటకు, భగవాన్ శ్రీరమణమహర్షి ఓ చక్కని సాధనామార్గాన్ని క్రిందివిధంగా అప్పడరూపంలో సూచిస్తున్నారు. ప్రస్తుత అప్పుడపు కథ భగవాన్ శ్రీ రమణ మహర్షికి వారి దివ్యజనని అలగమ్మాళ్ కు మధ్యజరిగిన జ్ఞానసందేశమ...

శ్రీసాయినాథాయనమః. నేడు శ్రావణిపూర్ణమి, 1912 ఈ పవిత్ర తిధినాడు సాయిబాబా ఆశీసులతో గురుస్థానమువద్ద బాబాపాదుకలు ప్రతిష్టింపబడ్డాయి. శ్రీసాయిసచ్చరిత్ర పావన గ్రంధంలో శ్రీసాయిబాబా తాము ద్వారకామాయిలో నివసించిన షుమారు 60 సంవత్సరముల కాలం తిరుగలిలో గోధుమలు విసిరినారని గ్రంధకర్త శ్రీహేమాడపంతు పేర్కొన్నాడు. ఇపుడు తిరుగలి, గోధుమలు, విసరుట, గోధుమపిండి వీని వెనుకనున్న వేదాంతభావమును పరిశీలించెదము. రచయిత ఈవిషయమై వేదాంతభావమును కొంతవివరించినా మరింత లోతుగా ఈ విషయమై తెలిసికొనుటకు జేసిన ప్రయత్నమే ఈ ప్రస్తుత వ్యాసరచన ముఖ్యోద్దేశము. పాఠక భక్తులు తమతమ ఆలోచనలకనుగుణంగా ఈవిషయాన్ని గ్రహించగలరు. బాబా విసరినది ముడి గోధుమలు, వాటిలో జీవమున్నది, అనుకూలపరిస్థితులలో తిరిగి మొలకెత్తి మరిన్నిగోధుమల నుత్పత్తికి కారణభూతము కాగలవు. కాని గోధుమలనొకసారి విసరి పిండిజేసిన వానిలో జీవము నశించి మొలకెత్తు పటిమ కోల్పోబడుతుంది. ఈ విషయంవెనుక దాగిన తత్వమేమిటి? ముడి గోధుమలు వ్యక్తుల అహంకారమునకు, పుణ్యపాప కర్మలకు, ఆయా కర్మఫలములకు విషయవాసనలకు, లోదాగిన కామ క్రోధ లోభ మోహ మద మాత్సర్యాది శత్రువులకు సంకేతము. గోధుమలు మొలకెత్తే విధంగా మన...

శ్రీసాయినాథాయనమః. పాఠక భక్తులెల్లరకు గురుపూర్ణిమ శుభాకాంక్షలు, సాయిబాబా దివ్యాశీసులు! సర్వజ్ఞత సర్వవ్యాపకత సర్వశక్తిమంతమునైన నైన ఆ పరబ్రహ్మ శక్తి సదా పరిపూర్ణమైనది. రూపరహితమైన బ్రహ్మమునుండి మానుషరూపం దాల్చి శిరిడీలో సాయిబాబాగా నడయాడిన పరాశక్తి పరిపూర్ణమైనది. హే సాయినాథా! పవిత్రాత్మయను ద్రవసారమును బ్రహ్మమనెడి యచ్చులో పోయగా దానినుండి యోగులలో నలంకారమూగ నీవు ఉద్భవించినావు. మహాసమాధియనంతరము నిరంతరం కొనసాగుతున్న నీ నిర్గుణ నిరాకార శక్తి పరిపూర్ణమైనది. హే పరాత్పరా, సాయిదేవా శరణు శరణు. అశాశ్వితము సదా పరిణామశీలమైన జగత్తులో సంపూర్ణ త్యాగనిరతితో నీవు జీవించినావు. నీ త్యాగబుద్ధి అద్భుతము అమోఘము. దీన జనోద్ధరణమే నీ అవతార కార్య రహస్యము. నీవు నిష్కళంక కర్మయోగివి. భక్తులనుండి ఒక్కటిపొంది వారికి పదింతలగ , నూరింతలగ సాయముగూర్చు దానశీలి శరణు శరణు. నీదివ్యశక్తి,సృష్టి నడుపునట్టి ఆత్మస్థితి. సర్వజీవరాశులయందు చైతన్యరూపుడవై విరాజిల్లు ఓ సాయినాథా శరణు శరణు. ఉపనిషత్తులు ఆత్మఒక్కటిగా పేర్కొన్నవి. ఆత్మ కదలదు, కాని మనసుకన్నా వేగంగా చరించును. ఇంద్రియములకు పట్టుబడదు. చలనరహితముగా నిలబడినను పరుగులెత్...

శ్రీసాయినాథాయనమః. Wishing all the fathers a vey happy Father's Day. సాయిబాబా కరుణాసాగరుడు, భక్తవత్సలుడు,ఆపద్బాంధవుడు,అనాదరక్షకుడు. ఆ మహామహితాత్ముని లీలల కొన్నింటినిచట స్మరించెదము. " లేదు,అట్లు జరుగనేరదు. నేనే దాని తండ్రిని. నేనిచటనే యున్నాను. పాముచేత కప్పనెట్లు తినిపించెదను? నేనిక్కడ ఊరకనే యున్నానా ? " ఓ ఆగంతుకునితో బాబా అన్న మాటలివి. కర్మఫలంచే కప్పగాజన్మించి శత్రు పామునోటబడ్డ చెన్నబసప్ప పూర్వజన్మలో తన బద్ధ విరోధియైన వీరభద్రప్ప బారినుండి తప్పించుకొనుటకై బాబాను ఆశ్రయించి వారి ఆశీసుల పొందాడు. మాటనిలుపుకొనుటకై బాబా సమయానికివెళ్ళి కప్పనురక్షించాడు. జన్మజన్మల రక్షణ సాయిదేవునిది. శ్రీమతి సదాశివ్ తార్కాడ్ కళ్ళపోటుతో సాయిని దర్శించింది. ఆయన కొద్దిక్షణాలు ఆమె కళ్ళలోకి చూచారు. అప్పటికప్పుడే ఆమె కళ్ళ పోటు తగ్గిపోయింది. నీరు కారడం ఆగిపోయింది. కాని బాబాకనులవెంట నీరు కారసాగింది. ప్లేగువ్యాధిచే మిగుల బాధపడుచున్న తనకురుమారునికై సాయిని ఆశ్రయించినది శ్రీమతి ఖాపర్డే. క్షణాల్లో నాలుగు పెద్దబొబ్బలను తమదేహంపైకి తీసుకొని ఆమెబిడ్డను రక్షించారు సాయినాథులు. తీవ్రమైన జ్వరంతో బాధపడుతున్న ఒక భ...