Shirdi Sai Telugu

శ్రీసాయినాథాయనమః శ్రీకృష్ణుడు బృందావనంలో గోపికలతో మిగుల ఉత్సాహంతో నాట్యం జేసేవాడట. అలాగే శిరిడీ వచ్చిన మొదటి రోజుల్లో మజీదు సమీపానున్న ఫకీర్లు కూర్చునే తాకియాలో శ్రీసాయిబాబా కాళ్లకు గజ్జెలుకట్టుకొని పారవశ్యంతో బహు సుందరంగా నాట్యం జేసేవారట. షుమారు పది పన్నెండేళ్ల పూర్వం శిరిడీ దర్శనం ముగించుకొని తిరుగు ప్రయాణానికి ముందుగ మరోసారి ద్వారకామాయిని దర్శించి కొద్దిసేపటికచట కూర్చున్న సమయంలో బాబా ప్రేరణచే నామదిలో మెదిలిన ఓ చిన్న భావగీతికనిచట పొందుపరుస్తున్నాను. సాయి బృందావనిలొ ద్వారకామాయిలొ సిందేసి నర్తింతు సాయి సాయీ యనుచు ఇహమిదే పరమిదే సాయి సాయీ యనుచు మహిమలా వేలుపే సాయి సాయీ యనుచు సిందేసి నర్తింతు సాయి సాయీ యనుచు. బాలగోపాలుడే సాయి సాయీ యనుచు లీల విలుకాడే సాయి దేవర యనుచు సిందేసి నర్తింతు సాయి సాయీ యనుచు. మోహనా రూపుడే సాయి సాయీ యనుచు సమ్మోహనా శ్యాముడే బాబ సాయీ యనుచు సిందేసి నర్తింతు సాయి సాయీ యనుచు. శ్రీసాయికరుణాకిరణాలు అందరిపై ప్రసరించుగాక! అందరికి శుభమగుగాక! ఓంసాయి శ్రీసాయి జైజైసాయి!

శ్రీసాయినాథాయనమః. "నా మనుష్యుడు ఎంత దూరమున నున్నప్పటికి,పిచ్చుక కాళ్లకు దారము కట్టి యీడ్చినటుల అతనిని శిరిడీకి లాగెదను." సాయిబాబా. ఇందులకు లాలా లక్ష్మీచందు అనుభవాలే చక్కని తార్కాణము. ఈవివరాలన్నీ శ్రీసాయిసత్చరిత్రలోని 28వ అధ్యాయమున వివరింపబడినవి. లక్ష్మీచందు బొంబాయి నగర ర్యాలీ బ్రదర్స్ కంపెనీలో గుమస్తాగా పనిచేస్తున్నాడు. 1910వ సంవత్సరములో క్రిస్మస్ పండుగకు ముందుగా ఓ స్వప్నదర్శనం పొందాడు. గడ్డంతోయున్న ముసలివాని చుట్టూ భక్తులు గుమిగూడియున్నారు. కొన్నాళ్ళపిమ్మట తనమిత్రుని ఇంట జరుగు దాసగణుమహారాజు కీర్తన కార్యక్రమానికి వెళ్లి బాబా ఫోటోచూసాడు. కలలో తాను జూసిన ముసలివాని పోలికలు పటములోని వానికి సరిపోవుటచేతను, దాసగణు తుకారాము కీర్తనాపారవస్యంతోను శిరిడీపోవుటకు మిగుల తపిస్తున్నాడు. బాబా సర్వహృదయ వాసిగదా, లక్ష్మీచందు మనసెరిగి వాని ప్రయాణానికి తగు ఏర్పాట్లు సమకూర్చాడు. అదేరాత్రి మిత్రుడు శంకరరావు వాని తలుపుతట్టి శిరిడీకి వచ్చెదవాయని యడిగాడు. పినతండ్రి కొడుకు 15 రూపాయలు సమకూర్చుటచే వారిప్రయాణం వేగిరమయ్యింది. రైలు ప్రయాణంలో మిత్రునితో భజనజేసినప్పటికీ బాబానుగూర్చి తోటిప్రయాణీకులతో ప్రశ్న...

శ్రీసాయినాథాయనమః. భగవద్గీతలో కర్మయోగము,భక్తియోగముమరియు జ్ఞానయోగముల ఆచరణద్వారా భక్తుడు భగవంతుని జేరగలడని శ్రీకృష్ణపరమాత్మ అర్జునునికి ప్రబోధించాడు. ప్రధమంగా యోగమనగానేమో పరిశీలించెదము. యోగమునకు ముందుగా వియోగమంటే ఏమిటో తెలిసికొందాము. వియోగమనగా విడిపోవుట లేక దూరమగుట మున్నగు అర్ధములు గలవు. ప్రస్తుత విషయమును ఆధ్యాత్మిక పరంగా గ్రహించుటకు ప్రయత్నించెదము. పరిపూర్ణ విశ్వచైతన్యము లేక పరమాత్మ నుండియే కోటానుకోట్ల జీవరాశులుగా ఈ సృష్టి ఆవిర్భవించినది. కావున ప్రతిప్రాణి జన్మకు ఆ పరమాత్ముని విశ్వచైతన్యమే కారణము. కాని భగవంతుని లీలేమోగాని ప్రతిజీవి తనమూలము మరచి వ్యక్తిగత అహంకారంతో జీవిస్తుంటాడు. అదే వియోగము, దుఃఖకారణము. ఆలా విడిపోయిన వ్యక్తి చైతన్యము విశ్వచైతన్యముతో ఐక్యమగుటయే యోగమనబడును. ఈ ఏకాత్మభావమును నిష్కామ కర్మల జేయుటవలనను , నిత్యానిత్య విచారణా పూర్వక జ్ఞానవిచారణలద్వారాగాని లేక విశ్వశక్తి మయమగు , పరమాత్మకు సర్వస్య శరణాగతినొంది భక్తిమార్గంలో జీవించుటవలనగాని పొందవచ్చును. అలాపొందబడిన ఫలమే మోక్షముగా మన శ్రుతులు వివరించాయి. ప్రస్తుత వ్యాసంలో భక్తిమార్గమును గూర్చి క్లుప్తంగా తెలిసికొనుటకు ప్రయత్నమ...

శ్రీసాయినాథాయనమః. 1)"శిరిడీ ప్రవేశమే సర్వదుఃఖపరిహారము ". శ్రీ బీ.వీ నరసింహస్వామి తన ఇద్దరు పుత్రుల మరణంతో మిగుల దుఃఖితుడై 1936 లో బాబాసమాధి దర్శించి పరమశాంతిని పొందాడు. 2)"ఆర్తులైననేమి నిరుపేదలైననేమి ద్వారకామాయి ప్రవేశించినంతనే సుఖసంపదలనొందగలరు". ఓ డాక్టర్ మేనల్లుడు రాచకురుపునుండి ముక్తుడైనాడు. బోడస్,అంబాడేకర్,సాఠే,చోల్కర్ మున్నగు భక్తులు బాబా కృపచే మిగుల సంపదల పొందారు. 3)"ఈభౌతిక దేహానంతరము నేనప్రమత్తుడనే ".దైవం ఉనికిని శంకించే శ్రీ ఎక్కిరాల భరద్వాజ బాబా సమాధివద్ద పరిపూర్ణ శాంతిని,తృప్తిని, తగిన సమాధానాన్ని పొందాడు. 4)"నా భక్తులకు రక్షణ నా సమాధినుండే వెలువడును ". నాగేష్ అనే భక్తుడు సమాధి ప్రక్క గదిలో నిద్రించేవాడు. అప్పుడతనికి,తోటివారికి సమాధినుండి రకరకాల సంగీతం వినిపిస్తుండేది. అంతటితో వారాగదిలో నిద్రించడం మానేసారు. 5)"నా సమాధి నుండియే నా మానుష శరీరము మాట్లాడును ". బాబా మహాసమాధి అనంతరం కాకాసాహెబ్ దీక్షిత్ మిగుల వ్యాకుల హృదయుడైనాడు. ఆనందరావు పాఖాడే, శ్యామాల సందేశం ద్వారా బాబా దీక్షితును శాంతపరచాడు. 6)"నా సమాధిన...

శ్రీసాయినాథాయనమః. దైవసన్నిధి జేరుటకు సద్గురుశరణాగతి మిగుల ఆవశ్యకము. భక్తుని భగవంతుని కళ్యాణానికి పురోహితుడు గురువని శ్రీరామకృష్ణ పరమహంస వచించారు. భగవత్ప్రాప్తికి మార్గదర్శి సహాయము తప్పనిసరియని శ్రీసాయిబాబా నొక్కివక్కాణించారు. మరి అలాంటి సద్గురుని సాయమందుటకు భక్తులకు వారిపట్ల వినయవిధేయతలు, శ్రద్ధావిశ్వాసాలు తప్పనిసరి లక్షణాలుగా యుండవలెను. సాయిబాబా శ్రద్ధా,సబూరి యను రెండునాణెముల సమర్పించి తమ గురుని సేవించారు. వారిప్రతిభకు తమ గురుసేవయే కారణమని వినయంగా వివరించారు. అదేవిధంగా పెక్కుభక్తులు సాయిని పరిపూర్ణ భక్తివిశ్వాసాలతో సేవించి బహు అనుభవాలను, సాయి రక్షణను పొందారు. ఆయా భక్తుల వివరాలే శ్రీసాయిసచ్చరిత్ర పవిత్రగ్రంధ సారాంశము. ఇందులకు విరుద్ధంగా కొందరు వ్యక్తులు తమ అజ్ఞానంచే సాయిబాబా పట్ల అవిధేయత ప్రదర్శించి పెక్కు కష్టములు కొనితెచ్చుకొన్నారు. అలాంటి కొందరి అనుభవములు నిచట పరిశీలించెదము. తాత్యా కోతే పాటిలు బాబాకు ప్రాణసమానుడు, అట్టివాడుకూడ ఓ పర్యాయము బాబా మాటను తృణీకరించి కోపర్గామ్ వెళ్లి కష్టాల పాలైనాడు. బొంబాయినుండి ఐరోపా దేశస్తుడొకడు యేదో ఉద్దేశంతో సాయిని దర్శించాడు. కాని బాబా యనుమత...

శ్రీసాయినాథాయనమః. శ్రీసాయిబాబ సర్వాంతర్యామి,సర్వహృదయవాసి. భక్తుల ఆశలు,ఆలోచనలు వారికి కరతలామలకములు. వారి రక్షణ అశీసులు తక్షణమే! శ్రీసాయిసచ్చరిత్రలోని భక్తుల పెక్కు యనుభవవములు, విశ్వవ్యాపకంగా నిరంతరం కొనసాగెడి వారి లీలలు, మహిమలే యిందులకు సాక్ష్యములుగా తలుపవచ్చును. ఈసందర్భమున శిరిడీలో జరిగిన ఓ చిన్నస్వానుభవాన్ని, పాఠకులతో పంచుకోవడం ఎంతో సంతోషాన్ని కలుగజేస్తుంది. ఆ రోజు సోమవారము ఫిబ్రవరి 20,2023. వేకువజామునే మేల్కొని కలసి వచ్చిన సోదరుడు నేను కాకడ ఆరతికై పావన సమాధి మందిరానికెళ్ళాము. కాకడ ఆరతి సమయాన కలిగే ఆనందం, మనసు పొందే ప్రశాంతత మాటలకందని మధురానుభూతి. ఎన్నిసార్లు వీక్షించినా ఆ యనుభూతి కొత్తగానే తోస్తుంది. అచటనే కొనసాగాలని మనసు కోరుకొంటుంది. ఆరోజు ఆరతి అనంతరం మెల్లగా మందిరం వెలుపలికొచ్చాము. అలా బయటకొచ్చే సమయాన మనసులో ఓ చిన్న ఆలోచనొచ్చింది. కాకడ ఆరతి యనంతరం వెన్న చక్కెర కలిపిన బాబా నైవేద్యం భక్తులకు పంచుతారు. వేరే లైన్లో వుండటం వలన మాకా ప్రసాదం అందలేదు. అయ్యో, ప్రసాదం పొందలేకపోయామనే చిరుపాటి నిరుత్సాహం మనసులో మెదిలింది. కాని అప్పటికే బయటకొచ్చాము గాబట్టి ప్రసాదం లభించే అవకాశం లేదు. ...

శ్రీసాయినాథాయనమః ఆత్మానుభవము లేక ఆత్మసాక్షాత్కారము పొందిన మహాత్ముడే సద్గురువు. అట్టి యనుభూతిని పరిపక్వత నొందిన తన శిష్యులకు సులువుగా అందింపగలడు సద్గురువు. అదియే శిష్యునకు లభించే అత్యుత్తమ గురుకృప. శ్రీసాయిబాబ, శ్రీరామకృష్ణ పరమహంస మరియు శ్రీయుక్తేశ్వరులు గడచిన ఒకటి రెండు శతాబ్దాలకాలంలో పవిత్ర భారతావని ప్రభవించారు.ఆయా మహనీయులు తమ ధర్మాచరణ, బోధామృతములచే సమాజంలోని సామాన్యులనుద్ధరించి వారిని మానవతా విలువలతో కూడిన ఆధ్యాత్మిక మార్గంలో నడిపించుటకు చక్కటి మార్గాల నేర్పరచారు. యోగ్యులైన శిష్యులకు తమశక్తి సామర్ధ్యాదుల సయితం వెచ్చించి, వారిని తమయంతటి వారలగా తీర్చిదిద్దారు. అపార సద్గురు గురుకృపకది నిదర్శనము. అనుపమాన సద్గురు గురుకృపామృతమునాస్వాదించిన కొందరి శిష్యాగ్ర గణ్యుల యనుభవములనిచట స్మరించుకొనెదము. వారి ఆయా అనుభవములు సాధారమనుజలమైన మనలకు సత్యదృష్టి, నిత్యానిత్య వివేకముల ప్రసాదింపగలవు. సత్యాసత్యా విచక్షణచే మానసిక దౌర్బల్యం తొలగి దుఃఖనివృత్తి కాగలదు. సమర్ధసద్గురు సాయినాథులు తమభక్తులకందించిన భావాతీత యనుభవములు కొన్నింటిని శ్రీసాయిసచ్చరిత్రములో వర్ణింపబడినవి. శ్రీసాయిసచ్చరిత రచయిత హేమాడ్ ప...